الأهداء

..

للرائع، والعراقي الاصيل، الاستاذ فالح حسون الدراجي

للاعلامي الشجاع، والغيور، وجيه عباس

الى موقع شبابيك، ومديره الأستاذ كريم البيضاني..

مع فائق مودتي واعتزازي

عيدت ماعيدت نگضي السنين ؟

ومانميز الطبگ من اعيادنه

ولو شرينه اثياب للعيد الجديد

الوان سوده وماتفرح اولادنه

اليضحك مكابرعبالك مستراح؟..

مرار من نضحك تره من اعنادنه !! 

العوز بايعنه اعله ارصفة الضياع

وبسَّطت ناس الغرب بجسادنه

چن ورث عدنه الحزن وصوَّنه بيه..

وأحنه هم نوصي الورث لأحفادنه 

منين مادرنه الوجه موت ودمار

وماعرفنه ليا كتر مشرادنه 

نخلّف الشبان مو لجل الحياة..

نريد نملي المگبره باعدادنه

احنه بين اثنين مابيهن مجال

جربيناهن هذني اشفادنه ؟

لو حرامي نسلمه رگبتنه ونضيع..

لو نسلمها بحلگ جلادنه !

يجوز للهجره درب نلگه ونروح..

شلون هم تطلع قچق بغدادنه ؟

احنه ضلينه بوطن فاتحته دوم

وعزفت اوتار الحزن شبعادنه

مانميز الموت من طعم الحياة

من تعد اموات عد تعدادنه

بينه رفسة موت ونعيش اعله هاي..

يعني هذا الضال بس نگّادنه

25/10/2015

الناصرية