گاعد ابنص الحديقه ..

وطلقه من يم إذني خطفت ..

وين راحت ..

يعلم الله بيا ضلع من هسه وگفت

خطر ابالي سؤال

شنو !!

معقوله الحديقه تحولت جبهة قتال

ما أكولن احتمال

لأن أكفر .. بس مجرّد أن أكولن احتمال

أني قاريهه الهويه

احتمال ألورده بيريه تصير ..

لچن صدّگ مستحيل الغصن يصبح بندقيه

والبلابل ما يلبسـّــن عسكريه

إنت عاين عالحديقه .. اتخيـّـل شگد صوره بشعه ..

ورد جوري وبالوسط وگفت همر

وانت لا تسأل عليه .. أني عالفراشه كاتلني القهر

الليل إجاهه .. اشگد خطيه ..

اتنام وين .. اتروح وين .. وهيه وك فراشه

شلون گـلي ؟؟

تبني بيت ابفوهة الرشاشه

شنو هاي !!!!!

ابيّت جاري .. أسمع اصياح البنات

شكو يمه  ؟؟

أكو شي ..

عادي .. لا يمه أبد .. لا ماكو شي ..

هاي جيرانك يايمه .. يلطمن بنص الحديقه امهدلات

لان قبل شويه أخوهن ..

عمره يمكن .. خمسه لو ست سنوات

چان واگـف .. يلعب بنص الحديقه ..

 وطلقه مدري منين اجتـّه ..

و هسه مات ..

و هسه مات .