نهاد الخيكاني
ها يگلبي ألوحدك ناسك نسوك؟
الناس ريح وماتدوم أحوالهه
وانت تدري الريح ماتثبت تميل
لاتكول الناس مدري شمالهه
ياما كتلك ناس البالك تعيش
ماتمر انت اعلى عتبت بالهه
الماي عدهه ورضت بستانك يموت
ونت دم عنبك ابجف اسلالهه
حتى شجرتهم لأن يمهه غفيت
صاحت الحطاب كص أظلالهه
من يذكرونك بعد كلهم نسيت
وطيبتك لازم تشد ارحالهه
جني أعلم خيمه كاتب مابنيت
اعلى التراب وراح أجز احبالهه
كون تعبك للعدو هم مايضيع
ولاتصير أحوالنه ابهالمستوى
غير كلشي الينطي ياخذ بالحياة؟
حتى سم الحيه بي موت ودوى
أدري تمرك ماايغزر شي عجيب
أني أدري ابكاعنه اتملحه النوى
فوك صدرك دوس داسو موحفاة
الأمس عدهم جنت اقدس من طوى
شاترف من الماي هم ايصيبه غيض
وغيض عين الماي والمعول سوى
الماي من تكعد على صدره الجبال
ايظيك صدره ويطلع ايدور هوى
هايكلبي اتصيرلك عبره وتتوب
اني أعرفك زين ماتصبر ترد
شافو ابدربيلهم تطلع قريب
دارو الدربيل خاطر تبتعد
ولأن يدرونك ندى وباجر تطيح
خضرو عاكول ماصارو ورد
ابيا جلد يالطبت اعليك السهام
ولك هي اسهامهم خلت جلد
ليش ياسيف اليجي ودليته بيك
جني ماشايل كلب شايل غمد
انت لوكلبي وتظل سيد هواك
هذا موكلبي اليظل عايش عبد
