سيروان التميمي/ بصرة
مانلبس هدم لوجان موش النه
وﻻندفه بغطه وندريه مو كدنه
عطش بينه ونكابر مانجيس الماي
وانذل العطش لو رايد يذلنه
وترده الفشلة لو عاين علينه الفاس
احنه اول غصن يم الله شجرتنه
نرجع بالعكس مو ليوره لكدام
وعكس كل الخلك ليفوك طيحتنه
احنه اول خلك عزبنه جبرائيل
وبحجايات الله اترسنه سفرتنه
وصحنه (اسم الله )حتى العدو من يطيح
اليجينه بسيف چنه نكابله بحنة
مامدينه منجل وي حصاد ابليس
وﻻدارت رحينه الا على حنطتنه
وﻻهزينه بيرغ مايخرخش خير
البالبرزخ سمع دبجة عراضتنه
هوستنه محمد والله والقرآن
(ودخيلك ياعلي) رباط هوستنه
ورفعنه الراية لكن مايلوك قماش
نرفعهه وتنحصر بقماش غايتنه
وصلة من الشمس شدينة بالعامود
ورفعناهه وكتبنه عليهه رايتنه
ياوادم ﻻتحصرون القضية بسيف
ودخان وعطش وخيول داستنه
وجفوف وتراجي ومتن ازرك صار
خل تفهم عقول البشر قصتنه
احنه المن طلعنه الدنيا بيهه فتوك
وخيطنه الفتك بحبال خيمتنه
ما ضيعنه حك ..غير احنه ناس اجواد
نرد حك الورك لو شجرة نكلتنه
من عركت كصصنه اتبلل التاريخ
وضيعنه الفرات بماي كصتنه
ترفين ويكحل عيونه بينا الهيل
الحنه اتحنه جفهه..بيوم جاستنه
معازيب الهلا وملكانه كلش حار
ابليس يرد ملك لو ضاك كهوتنه
ﻻيتبعنه شيعي وخايف من النار
وﻻيفكر جهنم تدنه شيعتنه
هيه الجنة موكب واحنه المعازيب
الله انطاهه النه وكال مالتنه
