علي الفضلي / الناصرية
نفض بيده النهر وشل لهاة الماي
وعرك ماي البكصته وغيم منه ابتل
سرفن غيرته وصوفرت وجه الخيل
شما صوفر السنبل يضحك المنجل
هزهز ذو الفقارة ونشف ريج الكاع
وضربت سيفه جانت تعبر عالظل
صعدت غيرته ودرفعت حجي الريح
غفلة ولن ضواه بينهم قد هل
افترت رايته وترست الدنيا افياي
وﻻذت خيم زينب والعطش وشل
مهندم بالحرب يعثر براسة الغيم
واليشهك بصوته من البعد ينشل
كاللهم همس عبد الله كالو نام
ماريد سوالف ﻻ فرس تصهل
رقيه بكيفه تريد النهر بالباب
من زردومه اجره وللخيم ينتل
طباهه الشريعة وهدل ظهر الماي
ثكيل وجفه شايل هيبة الخردل
يذبل لو سمع بالوردة من تنداس
حساس ابو فاضل زلمة ومعدل
فوك الرمح راسه يدور وي الريح
خاف الثام زينب بالتعب ينحل
سيفك مكبرة بكرابه دافن ناس
اسمع صوت وادم صرخة من ينسل
وجهك بالحرب يكطع انفاس الجيش
وبصوب الخيم مرتاح ومهلهل
تحب زينب تشوفك حقه ياعباس
هو انته ابو فاضل شوفتك تنمل
