الشاعر / محمد وجيه
ذكرتك بالوجوه الي ردت يمها انساك
وبدت بيك السوالف وانته تنهيها
وادير العين عنك والكلب يندار
وادير الكلب والكة شفافي تحجيها
البكلبي على لساني المصيبة بهاي
ما اجذب واكول العشرة ناسيها
انة اتناساك واضحك جذب وانتة بعيد
وبس يخطفني ظلك عزتي اهجيها
تمر سوالفك ناي بحياية الشوك
وتعرضلي الكرامة وما احاجيها
واغير مبدئي وباللهفة اغط الروح
وتفزعلي القيم بالكاع تجفيها
المبادئ والقيم ماتشمل اليشتاك
الهجر رب المذلة القيم شعليها
يالمقيد عيوني بسهر وبدمعات
صار سنين ظلك مامراويها
مشيت وقصرت ماخذت عيني وياك
الاخذ عيني بغيابك بس بواجيها
انة صفيت روحي من المضة بلياك
وانتة وياي نيتك مامصفيها
ضيعت العرف كطرة ببحر نسيان
وانة لمسة جفوفك محتفظ بيها
شجرة الذكريات استرها بلكي تعيش
ولو طبعك خريف وماتسويها
يالمكشف عشرتي كبال ياهو الجان
وانة حروف اسمك مامراويها
يبو سوالف شته ينكط برد ملكاك
اذا مو بيك روحي ابيش ادفيها
