الشاعر / مهند صاحب الربيعي
انه ابن الشمس والليل بية افكار
واﮔف موشمع بس راسي صاير نار
واﮔف منصلب بين الحياة والموت
وانه الموت بيه يبتدي بتذكار
ماحس بألم من ﮔد جروح الليل
ﮔمت انزع جلد حتى امحي بيه آثار
يقلقني السفر من يركب المجهول
ماخاف اغترب انه اصلا بلا دار
بس هاجس وطن يذبحني اسولف بيه
واهو مثلي شكثر محتاج الاستقرار
احبة بلاوعي وعيوني تبرة وياه
يصلبني واردله وانه ادﮔ بسمار
علـﮔني ويه همك سورة من العين
اخاف من الحسد بالاخص من الجار
ماأﮔدر اعوفك ﮔلبي هايم بيك
انه بوجه التنائي صرخة استنكار
احن انة لقيود بساحة التحرير
واسولف عن ربيعك للجرة والصار
قستك ماقست وعرفت ماتنقاس
احلى من الامل شنقيسك بأعمار
حضاراتك مشن بس حبنا ظل وياك
والحب هم حضارة والعشك مشوار
نبنيك بنفس ونعلي سابع ساف
بجناح الفراشة ونفرشك بازهار
ونطوقك نخيل ورطب لاحك تين
يطلع للغصن من يعشك الجمار
يااجمل وطن رغم المرارة البيك
احلى من الشهد ومطعمك الكرار
ويسألوني عليمن جرحك مسليك
احب جرحي لان متطوق بانهار
يطلع من سجن يتصارع وية الموت
فينيق ويحلق من رحم الاعصار
انة ابن الوطن واتباهة ابوي اعراﮔ
ساكن دجلتة بس للفرات اشتاﮔ
عنواني الامل واحلم يفز الخير
الغيبوبة انجلت وانطالب باعمار
اتمنة الوطن كلة مضيف يصير
يعمر بالهلة والملكة والخطار
واحب دار السلام ام السلام تصير
الورد بس الامان يريد كون الثار
وبعد مانختلف ويغرنا هذا وذاك
المخفي انكشف وانعرفت الاسرار
اواجب عالحكومة لكل مواطن بيت
لأن زحمه العراقي يـﮔـعد بايجار
