الشاعر / ادهم عادل
مري بيه عيون خرسه
مري بيه دموع وكحه
مري بيه ظنون تشنقني الصبح بين الدروب
مري بيه حروف عميه لشاعر اعل الماكو عمره
لشاعر برقة حديثة بلا سبب يطفه ويذوب
مري استري دموع عيني دموعي
تمشي اعالخدود بلايه ثوب
مري بيه نجوم تبجي وديرة مستاحس ضواها
ونهر طعناته بجروفه ويبدي ونه من الغروب وللغروب
مري بيه سنين صغري الضاعت بديرة عيونج
والبقه من سنين عمري تراب منثور اعله جفج
وانتي طشيني حدر جدمج سنين
مري بيه وخل ارسمج بالخيال بفكر شاعر
صورة من طعم العسل
واشربهه يومية الصبح ويه الونين
مري بيه سنين عمري بلايه طولج مو سنين
مري بيه سنين عمري بلايه عينج مو سنين
مري بيه سنين عمري بلايه دمعج مو سنين
مري بيه العين مشتاكة لدلالج
والدمع مل الركود يريد يطفح موج شوك
وياخذ العمر بسفينة
اي وين رحتي
دخذي دينج عاد مني اخذي روحي
ليش روحي بلا سبب يمي رهينة
مري بيه طيور بيضة
ونورس يطوف اعله ديرتنا الحزينة
مري بيه انسان فاشل كلشي ضيع من ادينه
مري بيه واخذي روحي بين دمعج
نهر مديني اعلى خدج
عاف روحه وتيه جروفه وطريقه
واخذي قصة واحد مضيعه زمانه
وكضه عمره يحب خيالج
وانتي محبوبة صديقه
اخذي قصة شاعر مضيعه زمانه
ورسم حبج عالخيال
وضاع ما بين الوهم بين الحقيقة
مري بيه
مري بس جلمة خطية
مري جلمة هذا متعذب خطية
ومري نجمة وكحلي عيون المسية
يلة ذليني بنظرتج صغريني بعين روحي
حتى اذل روحي بشرف بجفوف ادية
مري بيه الدنيا لبست ثوب ليل ونزعت ثياب النهار
مري لحظة عشك مشمورة اعلة بابي
حتى اعوف شوية بدر واحفظ شوية لنزار
مري بيه الشجر يبجي بلاية صوتج
مري بيه الصبح يبجي بلاية شوفج
مري بيه العصر خانكتة بجفوفج
مري بيه الليل صافن خال خدة اعلة الغروب
وينتظر حلة زلوفج
ومري انتي وصاحبي بنفس الطريق
وخلي افرش روحي شارع
يله مرو بلا رحم دوسو عليه
وضحكي حيل رويحتي من الضحكة ذابت
واني ميت جوة جدمج وانتي ما تدرين بيه
وانته يا توأم حياتي يله غازلهه بجسارة
ويله انتي شويه من خجل العذارة
ودنكي راسج عالتراب
شوفي واحد جوه روحج فاك من ضلوعه باب
وكلب متشظي اعله دربج
كضه عمرة من الصغر عاشك سراب
مري بيه العمر خلص مري
بس لحظة اعله بختج
مري اول عشك جذاب اعله روحي
ومري اول ضحكة جذابة اعله شفتي
ومري اول نفس جذاب اعله صدري
وفرحي عمري اليتمته سنين صدج
فرحي روحي باخر سنين العمر
خليني امشي اعله الكبر فرحان بعدج
