سعد طالب الزيادي / سماوه
طولك اتبده عالكاع الله خضار
وهاي مو كلش بعيدة
وانت لميت الضوه لوكت النهار
الخيل عاشكهه واجتك
غير خيال اعله ابوك
المايكدرك ماعرف كدر الفقار
انته هم من الله جاي
الخيمة بلطف جدهه غار …
نوح من عندك يغار
وانته يا اول نبي معاشرله وادم
تكطف ارماح اعله طولة ومفتهم حجي الحجار
التحبهم وين راحو كلها ضدك
وانته وردة .. وخيمة وحدة ..
ويمك العاكول جار
انته يا اول ملك من التواضع
كام يمشيلة عالنار
ها يهادود الله تطلب حتى من الموت ثار
يالتحب الوادم وميت عليهه
وماتحب لون الدمار
شلون رهمن بيك كلهن وانته ذاك
الفرفح بكترك حجي الله ولملمك من طشراك
“اليعشك الله يموت ركعة وواجبه
وانته حبيته اعله نيتك
غار من حبك عشكنه .. والملك رف حاجبه”
يا عشك ماجان يتوضة بغرام
جان كل نظراته تربة .. ويفرش اخلاقه وينام
علمتنه الخوة خوة ..
ومانجيب الغيرة كوة
انته ذاك العمرة هيل
انته ذاك الكال للكمرة اعله كيفج
حطي رجلج عمرج ويالدنيه ليل
انته رية وعودتنه منين مانشتم حرك نذكر عقيلة
وادبتنه
ابين كل لمة ربع تلكانه جربة
خاف رادتنه شريعة نروح للماي ونشيله
طفك .. وطفلك ؟ اهواية
احنه ياهم حتى من عطشو اعيالك
ابو فاضل شال جوده وخله فوك اجتافه راية
احنه كلش ما نفيد
احنه وادم عدنة جيب الدنية انته
واحنه مو مثلك نحرر
احنه متعودين لبنادم عبيد
واحنه كلنه و انته وحدك
غيرت فقه البشر
احنه خدامك يمالكنه ونكلك
ردنه كربك بينه من الدنية شر
