مصطفى المطوري/ البصرة
احتاروا بيك تعرك مرجلة وإحساس
ومن ريحة وفائك يخجل العنبر
بعيونه ملح يروي الصبخ ويزود
سيفه بلون وجهه بملكته يغزر
الشمس تعرك كمر بس يمر طاري فياي
الطف عركت نهر بيهه الكمر من مر
ما يسرج المهرة المهرة نثية تموت
جدام الكاع اذا يسرجها تتكسر
أكو فرحة بشر من يختنك مفتاح
وأكو فرحة يتامه بجود المشكر
الما يعرف علي لا يحلف بعباس
الما صال ابدر ما يفتهم خيبر
صرخ عالمشرعة وطفر الماي جروف
وطين العلكمي للسبعة ظل يعبر
ما عطشان حاشا ارتوى بشوف حسين
العطشان اليشوفه يشرب الكوثر
اذا مر اعله راية يتيه منها الراي
واذا مر اعله زلمة بهدمه يتحير
وموش هدوم نزعوا بيها نزعوا روح
النسمة شما علت تالي بنفس تنجر
النده عركت مطر لو نزل فوك الكاع
نده العباس سيفه ويكسر ويجبر
بقه حافر جربتك فوك وجه الماي
وماي العلكمي من الرجفة صار أصفر
طبرته بكيف الله الخزرة تكتل جيش
واذا زينب نخته الموت يتكتر
انه مثني الزلم ما ثني الحجايات
ولد كرار عدهم فشلة تتكرر
الشمعة شما بقت بالحالتين تموت
الماي شما كثر ينمد ولا يكبر
تره النورس فطن يعرف دروب الماي
ويحسده السمج جي يمشي بحر وبر
البيه نية وداع بحجيه تلكه حسين
وهوه حسين نفسه بنيته الأكبر
يالجودك جبير بكبر خلك حسين
الزلمة الما تطبره يموت متحسر
الصدر الما يلمك هذا عجزه صغير
يا عباس شخصك صعبة يتفسر
اشوفنك نده للوردة لو اجه الصيف
بس وكت الحرب تنكلب موت أحمر
