الشيخ احمد الإمارة/ كربلاء
زفني عمي وخل أفل مشبوگها
هاي كونه وانه ثق معشوگها
اركب الشكرة واخليهم ذراي
والأصيلة اتبين من الفوگها
صغير عمري وبيه حيل من الفقار
وعودي علمني اعلى فرك احلوگها
هذا سيف الحسن يامولاي اخوك
هو رايفها ويعرف افتوگها
انه ابن الماركب يوم الكديش
والصعاب بزودة فل مطبوگها
انه جسام واعرف اشلون اصيد
الكط الزينة گبل لا اضوگها
الااخلي خيولهم فوگها خَيل
وإلا اخلي الموت داير طوگها
والا اخلي اسباعهم تلبس تراب
وإلا اشيل العيطة من اعروگها
سيفي مطك واشتهى مكاون عداي
خل يضوك الروس من اعنوگها
انه بزر الغانمة آلو هد تميل
انه هاويها وبعد لا حوگها
اي وحكك الا اخليها رماد
الا ادوهنها واعوكر نوگها
خلها تعلى وعيب امدلها الجفوف
بنظرة وحدة ازفلي كل اعثوگها
انه اسمك هيبتي ودرعي ولواي
وزودي ابوي المالبس ملثوگها
للسيوف اضلوعي افكنهن مضيف
والسهام ابدمي أرد راشوگها
بروحي لهفة وشوك المفارك ثچيل
وبس الملاكة اليخفف شوگها
انه هذا اليوم صدكني موناي
والارواح وياك ترخص سوگها
