علي طالب / بغداد
الكاع ورث راسها بطرف العبي
وزينب اعلى الكاع دكت ثاية
اختل مدار الغيم من صار السبي
بوكت وجه الجبل صار مرايه
وصاح زين العابدين المعتلي
بله ياهو يفكلي ذني جفوفي
منين اشك الغيم واتعنى العلي
منين اصيح وصار حاجز خوفي
انا من ضيمي صرت عنهم ولي
ونزل جزر العافية من جروفي
عند اهل الله الطفل يصلح نبي
والدليل الرضع مضحاية
هوه موت الزلمة المن يختبي
وعالنثاية يروح يرفع راية
وصاحت الاطفال كلها ابلا وعي
عمة وين حسين خلي انشوفة
أوين عباس الترس زينب نعي
عمة خافن صدك ماكو جفوفه
الكاع صاحت بلى واضح مسمعي
انذبح آخر أمل بارض الكوفة
وبوكتها احتارو ابجيت صبي
والله زحمة اعباية يم اعباية
الكاع تزلف من تكلهه اتجنبي
زينب وما تعبر الها حجاية
ابراس زينب حسبة تلويهه لوي
الحسبة يا عباس بس تشوفك
مشيت الصفنة اعلى زينب دوي
وانت بالطف كملت معروفك
انت مو بالماي بل هم مرتوي
وجمعت كل طاقتك بجفوفك
الرجعت العباس زينب حسبي
مثل رجعت شيخ عند ولاية
وانتي زينب كلشي بيدج رتبي
النهر ما ينطي اليحسب الماية
