الشاعر / سيف الحلفي
احن واشتاكلك رغم المرارة البـيك
مثل شوك الزغار لنص شهر رمضان
وما صبلك دمع نشفت لهاة الـعين
بجيت الدم عليك ويبس الشريان
احن واشتاكلك حنية السياب
لجيكور القديمة ومنزل الأقنان
ومن اشتم صورتك بانفاسي يطلع شيب
لذلك من ادخن ابيض الدخان
واحس فزاعة جرحي والدوه بجف طير
واليكتلك شماتة مكابلة البستان
مثل جويات ناكة بكلبي الك جويات
بقن نيشان منك ليــله النيشان
مماتي وزفتك حدثن بنفس اليوم
ومن بدلة زفافك فصلولي اجفـــان
ترى انا معزبة كصتي وجفي خمس ضيوف
ياهو الفهمك عالفركة ماندمان
بس الدنيا منجل والعمر محصول
واحس رغباتي بير.. ويوسف الحرمان
واسافر بس تصاويرك ألمها متاع
واسد جوع العيون بصورتك يفلان
تهت بعدك وادور شجرة للإيجار
اكابر من طرت لا تشمت الغربان
طير اليحترك عشه وتشوفه يطير
يلطم عالصدر من يصفك الجنحان
دخيط سنين عمري بجيتك يهواي
وكحل ذكرياتي بمرود النسيان
والون صوتي وردي بيوم الاحجي وياك
واشرب ارتباكي بكاس الاطمئنان
ياعرج السواحـــل موسهل ملكاك
ياطير الكطا الما يركد بعنوان
تذب سنارة اذني تصيد حجي الناس
وتدور سيرتك لو صادتلها لسان
ياذلة هواي وفشلة الرسام
من يعرض لوحته بمعرض العميان
وما باريك ذمة شلون افكلك دين
وشفت دم الشراع بخنجر السفان
كتلت العنكبوت وانا جوه الغار
وطيرت الحمامة بجيه ابوسفيان
وحشاك من الغلط ياخلي بيه الصوج
ضيعني الخجل لو ادري ما خجلان
وتاكدت الحياء يغرك السباح
اذا ما ترفع ايدك عالنهر غلطان
لأن ابيض كلب يتكسرالطبشور
فليحيا السواد وتسقط الألوان
وما اصدك تجيني تعوض الي راح
يانهرالي يدفع دية للغركان
اصفن من اذكرك صفنة الأموات
وتضحك فوك جثتي بضحكة الدفان
وغيبة المكبرة…والموتى هم شمات
اذا طبت جنازة مفاركة الخلان
واسمع موتى يمي تنادسوا يحجون
ميت ماله احد ماورا صحبان
دمر بيه اعلى بختك سكت الميتين
احس حتى التراب البالكبر شمتان
هسة انه بحياتي بحبك انذليت
عادك بالكبر ما اريد اضل خجلان
العشك ماسه ودليلي ماسه كن بيك
ورجف كَلبي اعلى هجرك ماسكن بيك
انا بلحظة وداعك ماسكاً بيك
وشبكتك وارجعت ماجبت ايديه
