الشاعر/حاتم أكرم
الى من سكن حبه قلبي الإمام الشهيد وسيد شباب أهل الجنّة الحسين بن علي بن أبي طالب (عليهما السلام)
وهاي كاع انجـبلت بـدم الحسـين
وواحـد وسـبعين كلـهـم أوليــــــاء
يوكف التاريخ الهه بكـل خشــوع
ودرس لاهـل الـتـضـحية والانتمــــاء
كاع بيها الشمس يوميـه تطــوف
وتـنـزل تـبـوس التراب بكـل مســاء
كاع منـها الكمـر يتـداين ضــواه
وكـبـة العـباس تـضوي اعلى الـسمــاء
يم ضريح حسين مزروع الـيقـــين
ورايـة الإيمـان ودروس الـفـــــــداء
وريحـة الجـنة اعلى شبّاجه تفـوح
يشـمها بـس أهـل المحبة الانقيــــاء
وجرحه تلـكاه بدموع الـزائريــن
اويّ كـل حـصـرة بـنفــوس الـفقــراء
حـسين يانـسل الرجال الطاهريـن
جـــدّك المـبـعــوث سـيـد الأصفـياء
بيك خـجلانة القصيدة شــما تكول
وشـتـوصفـك يا سليـل الأنبيـــــاء
ويا قوافي اللي أكدرهن عليـــك
وانت خامس خمسة من اهل الكســـــاء
سيدي ياسـيدي شـكد مسـتحـين
واحنه بـس بالليتنا نـعـلّي الـنــــداء
ياسـفـينة السـارت ببحر الصعاب
ومـاحـنت ساريهـا كـل ريح البــلا ء
جيت لأرض المعركة وتدري الـيصير
وحتى يبقــى الدين اعلنت الفنـــــاء
لمـلمـوا ضـدّك حشود وغـادرين
وظنّوا يطفـّون نورك والـضيـــــاء
وانت شمس الله اجت تمـشي لأبوك
وامـّـك الزهراء سيـــدة النـســاء
ولكـدت خيلك على نـحـر السيوف
انذهل بيــك القدر ويّ الـقضـــــاء
بصدرك رماح العـدى وما دنّكيــت
وما نظرت بملكة موتك للــــــوراء
تشابكن بـيـك السهام وما انـحنيـت
وكـف نحــرك مأذنة وينزف إبـــاء
وظـل عـلـم مـرفوع راسك بالجنان
ابـّاب كـل جـنّـة ايـتـلـكـة الـشهداء
حـسـين يارمـز المجد والـتضحيات
يـلّـي صـارت ثـورتـك بـركـان لاء
ودوّت بـهـالـيـوم لاءك بـالـعراق
صـاحـهـا بـوجـه الـغـزات الأغبياء
ودمّـك كـبال الشـعـب شـلال صـار
يـفـيـض كـلـما سـال دم الأبـريـاء
انـت أول ثـائـر يـعرّي الـطـغـاة
بـيـك نـور الحـق كـشـف ليل الرياء
وانـت أول مـن ولـد بـعـد المـمـات
وينتصر جرحه اعلى سـيف السـفـهاء
عـيـّنـك ربـك عـلى الفردوس أمـير
ونحـمـد الخـالـق عـلـى خير الجزاء
في جـهـنـّم عـاقبـة مـن حـاربـوك
حــال فـرعـون وجمـوع الأشـقـيـاء
والـدلـيـل انـك على الحق يا شـهيـد
الـسـنـّة والـشيعـة تجـيك لـكربلاء
