الشاعر سيف بيان
دمر بيّه
وأراويك الشعر والليل
والحيرة بطريق الناس
وأوكع على رموشك نوم
لو أنوش الكبر بالراس
بلاية الظلمة مو حلوين
ودي أشرب ضوه عيونك سوالف كاس
وألبسك شوفي خاف اتضيع
نتلاكة بدرب بي ياس
والواهس كمر بي حيل
يرفع كل ظلام الله
النزل عدنا بصلاة احساس
ينجمة السهر شوك العين
وفراغ الليل بالتفكير للمايحلم ولاية
صرت اشبية اشوفك وين مايلعب هوه براية
دمر بية ..
بسكتة كل نهر ذبلان وجهي مطوف احجاية
لسه اندل عيونك ذيج
بس ارد اعطش هواية
للعشاك وجه الماي صاير للسمه مراية
شصلي بيا عطر منك
من تتعدة نسمة من الله
بلكي انباك
وكل البيدي ألحك صوت
واغني بكل وجع روحي والوج بوكت متﻻ فراك
جا ماكلت عين بعين
وكت ماعندي حتى اشتاك
دمر بية ..
بكيت بطرك سالفتك أصد لاحساس ياقبلة
اجرعك بالفشل جم دوب
موكل السوالف لليحن تحلة
ابين جني ماحبك
اوعد روحي انكتب فشلة
شصعب من صدك روحي
وحجي الينكال
صوج الشفة بي سهلة
سمارك حجي البريسم ..
وشفت طولك
ركص لمراية الوينك …. وجه يهوه
نگلت الشوف للغبشة
ولهثت اعلى البرد شباج
جي تسوة
وتباوعتك .. زلف مشمور مالاگي وجه مثلي
أويلي المستحة البية …..
من أغني الليل نايل واغفة .. طيف أسمر
واسافر بيك غيمة لكاع ..
المطر وي غبشة الگذلة نعاس اشگر
يهلبت تنكع الظلمة رسايل بالضوه من أسكر
جم دوب ؟
أعلك جروحي نذر للماي وادفة بحنينك شوك
حيل ماجنت اشتهيك ،،
صدفة الجمار خلتني اعلى ضوك
وذاك هو اليستحي من هلال روحه ومانزل للناس طوك
شراي وجهك ؟
من توضأ بغير دربي
وماتهجة القبلة زين
ودور بوجهي اعلى ديرة
عود ليش ؟ الماغبش لالله أذان
ينعس بشعرك حريرة
يمتة طولي وطولك انمدهن ظفيرة ..؟
وانت حل كل شبكة مارهمت على احساسك جبيرة
شكال ليلك ؟
من غفة الموعد حمامة ودرب المزاعل حلة
شلي بالنسمة التجي وشالة هله
عبنك تنتشي بروحي
يغار المادرة عيونك تدلي التايه بلونه
يالاملح سريري بطيف
لون جيدك يكود عيوني شمسية
أزخ روحي اعلى خيعونة
وانتة ذاك الختل الكمرة ورة بيوت النثاية
وصلت الديرة اعلى لونك
عوف كلمن ..
مادرة الكحلة هلاهل تنقري اعله عيونك
