احمد العبيدي/ ديوانية
يكاسر عين گاع الطف
وعلي لو بيدي ما اشربك
وعلي لو بيدي اشگ خد النهر واچفيك
وگودك للعطش مذلول وازهگ بيك
ويخيمة شبيچ خرسة راي
دنخي ام البنين وما تلوحچ نار
بس شميتي جمرتهم بعد مالچ ولا تذكار
ويچف شبيك ….
تركض للتراچي بلايه رفة عين
تراچيها هدية حسين
افه اعلى الدنيا التخليك
وتگص الچفوف الحاظنات الجود..!
يدنيا انتي الصلافة البيچ ما وصلتها بت الليل
لاااا وتزود.!
و اي يتراب….
شمالك ما عميت عيون مابيهن نظر بي خير
بس اعلى العبي جوعان خليت العقيلة اتحير
ما بريك
حالك حال شمس الطف
ويشمس شبيچ دصيحي الغيم وتغطي
لو تدرين ياهو شفافه ذبلانات ما صرتي.!
چملتي العطش ضعفين حد گلب الرضيع انطر
دروحي شبيچ خل تبرد،، وحشمي الغيم خل يمطر
اي يا غيم ما تمطر
انه حتاريت بيك حسين شنهو انته
چم زمزم مچلب بيك وانت ولا درت بالك
لو هد شخصك اعالگاع تنزف ماي،، بس هديت بخيالك.
يا شيطان بيهم غلبته الدنيا وتدنالك..؟!
