حيدر هليل /  بغداد

عندي زينب والخيم والمي قريب

وعندي چف بخنصره يگود الجروف..

وعندي سيف ينام بگرابه ويصيب

من تشوفه الرگبة تشبع منه خوف..

هذا وكت مزامط اليشرد يخيب

اني واحد مستعد وانتم ألوف..

الينسحب للبيت اجي مابيها عيب

عندي واهس حط نقط فوگ الحروف..

طلب مني رواحكم الله الحبيب

خله عزراييل شابع مني شوف..

اني ابن بدوية وبگلبي اللهيب

من لگيت الثار سرفنت الچفوف..

واني من اهل الله مو واحد غريب

وهاي ملك اجدادنا گاع الطفوف..

طبعي أعالج كل حرب مابي طبيب

عندي سيف لكل جرح عايزلة روف..

عمري زينب ماوصل يم راسي شيب

كاسر بعافيتي طغيان الأنوف..

واني محرب بالضحى بوكت المغيب

بالمطر بالصيف وبوكت الكسوف..

ياهواها المشرعة بريتي يطيب

ماتهمني المعركة بكل الظروف..

اني لو رايد نهر من الله اجيب

ومايقصر ربي رحمان ورؤوف..

عيالي تعطش عينهم چي راح أغيب

تارس عيون الخيم من وجهي شوف..

بالخيم تكبير صوت العندليب

والنوارس لابسة أحرام وتطوف..

من قريت الفاتحة بصوتي الرهيب

گبالي شفت تنادسن كل الچتوف..

زينة الطف بالحرب قسمة ونصيب

وآني شاهركم قبل شهر السيوف..