الشاعر / محمد المحاويلي
أمي يا صبر وأحساس وأشواگ
وادمـوع وحنـان وسهـر وفـراك
وخواطر صافية وعشرة وسواليف
ومعـاضد بالزنـد والحـجـل بالساگ
أمي البيت كله ومنبع الطيب
ربتنه ابحضنها اتخاف ننباگ
أمي اتحبنه حيل وتسهر الليل
ودللـول الـولد يـبـنـي غـنـاهـا
امي العافية وموگد للعيال
تـدفـينه بمحنتها و هواها
على التنور تخبز جفها ابو الخير
أمي مباركة ويشع ضواها
أمي الشيب اجاها كبل متشيب
ولهـذا السبـب يـكبـر غـلاها
تحب جيرانها وتسأل على الناس
أمـي بعـوزها اتـعيـش بـنفـاهـا
علمتنه الوفه ورضعتنه الاخلاص
أمـــي ماتـرد واحـــد نـخـاهـا
أمي شكثر تعبت شافت ضيم
حتى انصير نجمات بسماها
كبرنه وكبرتنه وصرنه رايات
وبصلاة أمنه ودعاويها ومناها
يارب يا إله الانس والجان
تحفظها ونجازيها برباها
أمي وشنهو اعز من امي بالكون
امـي البـاري يـعرف مـستواها
فقيرة وماتغث الهوى لو مر
مريضة وبس محبتنه دواها
ابد ماتعرف المنية فد يوم
ولا تقبل بشر يمشي وراها
أمـي علـمتنه انـصير شجعان
وصدوقين واهل غيرة أو وجاها
إذن من دنيتي كلشي آنه ماريد
بس اكسب رضا الله ورضاها
