رحمن الركابي/ ديوانية
حسين تربات الله وربات الرسول
حسين خطاها الحياة بلايه طيش
حسين سالوفة بخت بالطف حجو
الله سولفها ونصر دمه اعلى جيش
حسين بالطف رفض يوصل للفرات
والفرات يگله تحرگ گلبي ليش
دزلي عباس وجربته اسگي العطاش
ليش اموت بحسرتي خليني اعيش
الينذكر وياك بالطف مايموت
واليضدك الله يبلي مدري بيش
واني مو ضدك صرت هيج الله راد
وحطني يم انذال خيرهم يزيد
من اجه العباس طلعت روحي ليه
وهو ردها وكال منك ما اريد
وها يشيعة السالفة افتهموها زين
حتى ذكر حسين دوم يضل جديد
حسين قمة مرجلة وقصة وفاء
حسين فكرة مو اسوار انلبسه بيد
حسين منهج لازم ادرسو صحيح
حسين منهج لازم تدرسو صحيح
حسين مو بس للطم وكت العزاء
ومو اطبر الهامة والغاية رياء
حسين خدمة ونية بيضه بكل وكت
من يمر موكب عزاءه بعيني ماصد اعلى بت
الحسين اعظم قضية مو فقط اعظم شهيد
الحسين وي المنية وصار للعالم نشيد
تردد الاحرار بسمه ومنه تتعلم عبر
وكاتب التاريخ بالدم كل مظلوم انتصر
حسين ثورة بكل وكت ضد الطغاة
الشايل حسين بدماغه زحمة يكطعها الصلاة
الـ مايعرف القبلة وين …. لايجي يزور الحسين
اقصد اعلى الشيعة حصرا ماعليه بغير دين
