مصطفى الياسري / كوت
بويه متون عندي ومو حديد امتون
الشالن دفو جفوفك سوط ما تكدر
الجرح شكَـ متني بعدك والملح عطشان
عطش عبد الله لكن عالمتن يخدر
وخيمة عمتي زينب متني شال عتاب
عتب جدتي الزهره لا بعد أكبر
كَالو راح أبوج وكَلت أصدكَ شلون
وجفك فوكَ راسي بعده مايه اخظر
ياموسم هوه الله منين اجه الدخان
بس شافك رحت ظل عالخيم يفتر
أخذ وجهي الخريف وانته ما مريت
ربيع وبعده وركة اعلى الغصن اصفر
مر ياسالفة اسم الله خاف نطيح
الدرب طوله غريب العدل بي نعثر
مر يالون وجهي المالفاه اللون
الوحه بغير لون منيلهه المنظر
مر مو مرني منجل كَطع عمري الجان
بخنصر جفك الوياه جنت أسهر
من اكلب ارشيف عمري وصورتك بالعين
من تمر صورك روحي تطشر
جنت أكَعد وياك اسنين عمري بيوم
وجنت تحجيلي قصة هناااااااااااك أذكر
العصر وباب خيمة عمتي الحوراء
دم مابيهه قصة جدتي وحيــــــــدر
اريد الماضي يرجع حت اشوفك جاي
وارجع بالوكت والميل والمصدر
بعدني ازغيرة مو مال امشي درب الشام
حت ترد يبويه شلون ارد ازغر
صدك لعابتي الودتهه عمتي وياك
عفتهه بخيمة امي تردهه ما تكدر
شدت ورد نكعد من تمرنه طيور
من يكعد ويانه ينشز الخنجر
من اشوف السيف اكره كلشي اسمه اهلال
من اجه وبحلكَه شايل سالفة منحر
بويه السالفة موخوف خوف فراكَ
المفاركَ عزيزه من النفس يحذر
اجر حسرة بغيابك كسرتلي ضلوع
من اجرهه الحسرة عادي النفس ماينجر
من تطلع حسرتي لا جهنم نار
ثق لو سمع بسهه الماي يتفطر
تره احنه بزود زينب نمشي جن عباس
تره الاعلام ضدنه بصيغة المنكر
وعلي طبينه طبت حيدر اعله الباب
قلعنه الشام بس حيدر قلع خيبر
كلش خايفة ومنهم ابد ما اخاف
باجر خاف بينه يتاجر المنبر
المستقبل ذكرنه احجاية اخيرة ويا
التاجر بينه وبقصتنه ما يؤجر
