عباس الحجار/ النجف
ياعلي الدنيه يتيمة ابلا ضواك
ولو تشوف العين حمره ودمعتي
يركض ابمتني الخبز زاد ومضيف
ومن رحت مامر رغيف بصفنتي
دار الايتام بوكت حيدر سراب
وهسه كلهه ايتام بعدك ديرتي
ابن ابو طالب جنت موش اليتيم
بنور وجهك تضوي جانت عفتي
وانت من موجود احب الليل اكيد
الليل جان وياك يكظي بعازتي
ومن رحت ليلي اليمر بس ظلمه بي
وما اطخله الراس واطلب حاجتي
بنورك اتوضه علي بوكت الصلاة
ومن اصلي القبلة حييت سجدتي
وبعدك الجامع نسه ذاك اليتيم
وعالرصيف تصير كامت ركعتي
شرد اكلك ياعلي يابو اليتيم
تذبل الجنة من اسولف حالتي
صدري جان بعرض بيت المسلمين
وهيبة باسمك ياعلي بين اخوتي
وطبرتك ثلمت الدنيه من الربيع
والخريف ينام دمعة بحسرتي
ياعلي قوس القزح بعيوني صار
بلون الاصفر كمت اشوفن دنيتي
ياعلي بوجه الخبز بصمات اديك
بدون اسمك ياعلي تغص سفرتي
انت طبرو راسك بسيف ورضيت
وانه هم رضيت هجرك طبرتي
