حسين الخاقاني – الناصرية
دليلي ابغيبتك يحسين شالوه
وعقيق الجان يجري كبل شالوه
عكب مصرعك راسك ليش شالوه
على روس الرماح السمهريه
على الصيوان خيل الكوم هاجن
وخواتك من مرار الخوف هاجن
كوم انهض يبو السجاد هاجن
رباب وزينب وسكنه ورقيه
الشمر لختك يبو اليمه سبلها
وصاحت حين عالناكه سبلها
يخويه ياهو لجفوفك سبلها
وياهو الوسدك حدر الوطيه
الـــدهر شتـــت شـــملنه بالظعينه
ودلـــيــلي سيـــوف اميه بالظعينه
وســافه الــشــمر يحدي بالضعينه
وابـــو فــاضـل عــلى الغبره رميه
يـــبو الـــسـجاد گلي شصار وجره
أهــيّــس نــار حـــدر الظـلع وجره
يگـــلــها الطفـــل دمـه سال وجره
رضـــيــع وفــطــمته سـهام المنيه
ضمـــيري ابكعـــبة المحنه يطفلي
ومهجتي من تشـــب دمعي يطفلي
آنـــه امـــك واهـــز مهــدك يطفلي
نســـيـت امصـــوب ابـسهم المنيه
وحك مسلم وحك هاني وطــوعـه
وفي لحسين أظل بآمره وطــوعه
كلبــي إشما أعذلـنـّـــه وطــوعــه
يكـلـّـي الطوع طوع إبن الزجيــّه
مصاب إحسين أبد بالكون ياجــــد
مشه إبدرب الشهاده وعرف ياجد
صاح بصوت فتني العطش ياجـــد
يراعي الحوض يالتسكي البريـــّه
نصبنه بكل كلب للحــــزن منبــــر
لبــو السجـــاد موخســـران منبــر
اليــريد الشفــاعــــه وذنب منبـــر
الشفاعه إحسين إبن سيد البريــّه
مثــــل لحسين أبد ألكـــه ولاجــــد
وسبحان الخلك شخصــه ولاجـــد
أمه الزهره أبو حيدر و لاجــــــــد
محمد سيــــــّد الكـــل البــريــــّه
إعيوني إمن البجي ياناس كـفـّــن
على اللي جاد دون حسين كفيـّـــن
إلك كفيــّــن يالعبـــاس كفـّــن
كفو مـنـّك يبـــن حامي الحميــــّه
شبــل خلــّف علي الكرار عبــــــــاس
وضحك وجهـك يَكون وجان عبــّـاس
يا جف المراجــل زيد عــــب بــــاس
انولد راعي الوفـــه وراعي الحميـــّه
