مصطفى الدلفي/ ميسان
بعد عودة جواد أبي الفضل العباس (ع) الى المخيم بلا كفيل ..يراه الإمام الحسين (ع) فيتوجه نحو الفرات ليرى من بعيد ذلك السواد الذي يعلو ضفة النهر..فيقول متسائلا…
أفه عباس طايح لو بديت أحلم ؟
لا غلطان مو عباس مابي شارب امحزم..
أريد أشتم رفيف الدم !
مادام الولد عالخال
ثلثين الورد عالشم !
الله ايساعدك يادم
الله ايساعدك يادم
الله ايساعدك يادم..
مو عباس..لو عباس چا سلم
هذه العالفرات اكوام والعباس ما يلم
لو طايح صدگ عالگاع چا خاسف سلف نيشان
غير الگمگم أمن ايموت يتنگب علي ديوان
چا لو ميت العباس مايتنگب القرآن ؟
حتة ابغيبتك وفاي تفتر عالخيم دخان
يالراضع صدر خيمة
گبل من چنت اللعبنك واشمرك فوگ
تنزل زارف الغيمة !
شلون اقنع طحت عالماي..شوما گبنت هيمة ؟
شو بعده بثدي الحرة الحليب أبيض !
شو دورتك امن الباب والبسمار
لاخر دم على اعيونك ولا صح بسمعتك رض
أعصر ياخيم و اتطيح..
دورتك ابوجه الغيم من چان المطر ينكض
نث طولك عليه اجفوفك خلصت المخيم عض
شد لوني الگمر مشگوگ
نز بين الضلوع انگاب ظل حبل الظهر ينشاف
گوم اوياي ياعباس احس مبيوگ مني اجتاف !
وذا عافنك اجفوفك
حلاة الخبزة من تنعاف للعازة
صوغني الفشل جم لون ..
من يترك مراديه البلم يتمدد اجنازة!!
