مصطفى الفرطوسي/ سماوة
دلة استورحك نكلة اجدامك هيل
وانه خشم ابدوي اليتنفس الكهوة
من اتذكر خيالك يهفت الفانوس
وابوكك من ظلام الليل بالكوة
كسرت خاطري بكسرة افياي البيت
اذا وجه اعلى راسي وانت ماهوه
مامش هدهد اليوصل لعد عباس
ويكله الشمر بعيالك شسوه
مرات انحني بس ظلي شاخص دوم
اليحط ظلي اعلى طولي يكول مو هوه
يالطولك نهر هلبت حسيوه ماي
رقية من العطش عباس تتلوه
وجهي وخيمتي ولون العباه والليل
واحد لونهن هيج الوكت سوه
يعباس من ازورك أسعى سبع أشواط
يالراسك صفا وجفوفك المروة
مداسك لو مشيت يحني راس الكاع
اليغسل بماي وجهك طلبته الخوة
شني تستحي مني ترد بلايه زنود
لو بس طيف ردلي اندارلك فدوة
مابياش حيل موادعك عباس
يخيال الشكر كص الزند كبوة
لملم طولك وزلزل أركان الموت
ورفرف بيرغك فوك النجم تكوة
يخاجيتك بخت ومزوره الكرار
لثكل احجايتك ساك الأرض تكزل
ادريبك طير زينب ذيب المهيعات
وادري لخزرتك وجه السمه يجفل
فتلت أرواح بيدك خيط الصوف
وبمغزل الموت براحتك تغزل
يا خباطها وحواسها الرفاك
بكيعان المنايا بكيفك اتعدل
ماشايفتك أبداً من تطك بالسيف
بس أتصورك عالحرب من تدخل
تطب طبة صكر وجه اعلى وكر البوم
تطب طبة شيوخ بشاربك تفتل
