الشاعر / كامل الركابي
باصابيعي العذاب
هواي مجنون
من تلمس اصابيعك
عطش
وتفيض بيها اعيون
أغرگ بالمحبة
احترگ ..مفتون
يلهب روحي
برد الليل
يطفى بروحي
جمر الليل
وتحاصرني لظنون
تعصرني وجه مسلول
خايف
من عذابه ايطول
وتطول المسافة البينك
وبيني
ويظل مخمور
طيفك يلعب ابعيني
أحبك
لاتخليني
شجر اصفر خريفي
وانت اخضر دوم
بحنيني اشراع
وبروحك سفر لليوم
تعال وزيح الهموم
حط ايدك على اعيوني
تشوف اشگد لذيذ النوم
وانت اوياي
احس كل العطش بالروح
ينبع ماي
اضُم اجناحي لجناحك
واطير اشما تطير اهواي
يالضميت بگليبي جرح
شتگول ؟
هذا الليل من بعدك
عذابه ايطول
وتسامرني لْظنون
باصابيعي عشگ مجنون
واصابيعك
تخاف اتمر شمسها ابليل
العيون
لاتسهر
ولاتخدر
ولاتنام
يالضَّويت بيك العام
من ماشوفك اشگد وحشة
الايام
خذ گلبي الك محتام
خذ گلبي الك رايح
يحبك حتى من اتصير
مر
ماصخ
حلو
مالح
واحبك حتى من اتغيض
روحي
وعينك اتواكح
تعال
ولاتخليني انتظر دوم
دايخ..
يالبگت من عين گلبي
النوم
تميل ابلا نسيم أغصان
روحي
اتريد مرة اتبوس غصنك
يوم
آه اشگد بعيد انت ومحبتك
لوم
آه اشگد قريب انت
ومحبتك طيب
يالخبيت ندبة ابعمري
من اتغيب
تكبر جرح لاينزف
ولايطيب
واظل مكسور بغيابك
اظل مكسور
تسكن وجهي وحشة ليل
ويموت ابعيوني النور
أعمى من العشگ للماي
يمشي بلا درب مسحور
دليني
ضعت بيك
اعمى
وحوبة العميان تاذيك
دليني
غميگ انت واخاف
الگيش
فص اعيوني
حبّة لوز بچفوفك
أشوفك بيش
اموت اروحلي باسراري
محبة افديك هاي الروح
وانت اتعيش !
