مقاطع من قصيدة الشاعر الكبير شاكر السماوي
علامك…. شحشحيت الشوك بعيونك؟
علامك…. لملميت ادروب مفتونك؟
علامك…. سهريت جروح مطعونك؟
علامك….. ياعلامك
ياعلام احروفك العافت حبرها
وجتني هسه
تنكر عيون القرتها
وتنكر الجف الرسمها
وتنكر الصورة النبية
الجرجباها ابطبكة اجفوني سطرها..
ومو علامك
يا علامي البيك اضحت روحي وردة
غبشة يبجيها عطرها
ويا علام الشوك بيّه من تكلي
انسه وانسه
شنسه ونسه حتى انسه اشما تريد انسه بظنونك
انسه طعمك؟؟
لا وحك الشوك والزعلة وعتابك
لسه..لسه ذيجه بيّه
هالة الضحجة وعطرها الذوباني ابين اديّه
ولسه… لسه مستحاك ابعيني يسبح
ضي دواير شالت الرجفة الهنية
ولسه لسه مهامسك بيّه جفافي
وجف يحط اخياله عالنسمة هوية
وآخخخخخخ….
والسوط اعلى دمي، خطني بسطوره قضية
اشما نزفهه الدم ضميري
ايفيض بعيوني قضية
بيها شفت الروح ثورة وموعد وشعر وقضية
وبيها شفت الناس كعبة ومشنقة وجرح وقضية
وبيها شفتك شوك يكبر بالقضية
البيها حطني الخوف مرّة ابين ايديك
وراد منها ومنك انته يشتريني
وشتراني
وما كدر يندل ضميري
ومنهو يكدر يشتري من الدم رفيفه؟
ومنهو يكدر يشتري من الجفن طيفه؟
ومنهو يكدر يشتري النجمة بسماها؟
ولو شراها
كلي يكدر يشتري وياها سماها؟؟؟
كلي انته يلي تكدر تنسه لاتنسه وتكلي
انسه وانسه
شنسه وانسه حتى انسه
شما تريد انسه ابظنونك
انسه هجرك لاوحكك
شاحلة من طعم الليالي
البيها اشوفك ماتجيني الا مغتاض بخيالي
جا يبعد الشوك كلي
اشلون اكدر انسه
يالتناستكم ظنوني من خواطرهم قرتني
وهدهدتني ابصحوة جفوني وحجتني
( حلمت مرّة بانني فراشة ، واستيقظت ، ولا ادري هل كنت انسانا حلم بانه فراشة ام انني الان فراشة تحلم بانها انسان )
حاير …. ما لكه لكوزه ربابة
انسان طاف بذكرياته…. شبجت انجومه ابضبابه
انسان شاف الكاع دمعة.. من بجاها .. خضّرت جيله اعله بابه
انسان عاف الحب حمامة .. من حداها
اتنسّرت تنهش سرابه
انسان بيه الطين ينده… ولا ربابة اللي تدكني وتدفن سنيني ابعتابه
ولا ربابة
البيك تنشدني وتحطني ابطبكة اجناحك نسايم.. تبحرك فرحة ابعذابه
