علي المطوري / الاهواز
ما احچــي العتب للماسمــع لعتـاب
لأن تنعـد عــدم چلماتي للطرشــان
ولااحچـي چلمتي بلايــه كل تفكيــر
احـس كـفران بيهه اچلیمــة الغلطان
اويــدل خيــرالكلام ابقلة الچــلمات
تره حچي الکثـر یتسمـه الک هــذیان
معصوم ابصحبتــي ورافض الموزين
انا گليبي نبــي وماصاحب الشيطان
مو رفض الگلــب ميماشي الموزيـن
يتـصـدر أمر مـن عقلــي ولوجــدان
شكيت بخلقتي وچـني مومن طيــن
من غيــره خلقني اوغاية للصحــبان
كشــخ بيــه الطلع ويايــه كل ابكان
لأن ابن المجالس وبــن اهل ديــوان
ابد ماهــو ملاك الكشخة بالملبوس
تــره اليلبس عگل تتساقط القیــطان
أخـوتي امن الربــع مافرقتهم چــود
وعنـدي احساب ربعي بحسبة الخوان
صريحة اشگد خطوتي تچبش الخطوات
ونيتي اوي الربـع نيــة نبـي وقــرآن
كـرمت الحــديقـة ابنية الـوردات
وعــزبت الفراشـة ابمـدت البسـتان
منواتــي أجــل وتمنى بيــه تصيــر
لأن مـوتــي رزق ويشــغل الدفــان
هیچ احساس عندي أرق من المــاي
وترافــة شوگ عندي بغيبـة الصدقان
الغيمة تــزخ مطرهــه ابنـدوة الفلاح
وروحي تـزخ صلح لصويحبي الزعلان
انا تنفس رفاگــه ابساعـة المخــنوگ
وتره الشباچ ريــة ابوسطة الحيــطان
اليفهمني غلط لي ذم حچــي بمگفاي
بس الماي يفهــم كل حچي العطشان
تره اليحـچي ابوكتهه اينجــح الچلمات
مثـل شهگة ابوكتهه اتنجـح الغــرگان
تره بس العبــد يعرف سوالف صــوط
وطبع الحــر يعرف سوالف الخـرسان
اليــدمع من چـذب اعرف دمع تمساح
اشوف ابداخلــه يطرب فـرح عــرسان
اولاينطــق شخــص بس اناوانا يگـول
خلي الناس تنطق هذا خـوش انســان
