محمد حميد/ بابل
اكو بعيني سوالف كلفتني رموش
من لحضة رحيلج نار بيه شب
احسبيني حمد شاف بشليلج ريل
تاه بديرته وجن حيله مايحزب
ابكل نكلة جدم شهكة نفس متعوب
احس الماخذج بجفوفج مجلب
وين انطي الوجه ذاك اليحب معروف
وانه ديرة خضار تصوفر من تحب
وشلي بجيتج تخنكلي رية وصوت
مثل حال السجين بجيه المغرب
من كثر الطعن سموني مكفة الناي
وصرت انه ونس للواهسه مغندب
انه بعازة خلك يحمل وجوه ثكال
هنيال الخلك اليحمله المعزب
اسلب راحتي من ارد اشكي لله عليج
يحجي ويه الارض من يدعي المحدب
مشدوه الفكر محتاج جيتج راي
انه مخلص العمر وياج بس اندب
لميني علكيفج بيه كومه احلام
من فسرهه يوسف كلي مامذنب
وياخصر الشجر جم ذكره توجع بيك
تمحيهه السنين وابقه متعذب
وشاكل ذمتج شكله جناح الطير
مو شغلة كره بس اليحب يعتب
