ايهاب مطشر/ سماوة
مرني وترسني سوالف بيهه شوك
سوالف حجول الشريفة وخايفة
اردن اليحجي صدك تنور طين
ماتفرزن جلمته من اشفايفه
مايستره الصنكر الكناي شوك
الخيل تعثر لو ركض ماشايفه
هجي ينكثني الهوه من ارد اشتهيك
وانكث شليلي قسمتك زالفة
اذكرني ليل وسير على عيوني طيف
الحنة ماتنسه جفوف الدايفة
ما ابيعن صوتي للسمعة ثجيل
كوه الم حيلي واصيرن سالفة
من اصدن وجهي اشوفنه غريب
حته المرايه الحنينة مخالفة
من خذاك الماوصل مسحاة ابوي
الحسرة واكطوف التتن متوالفة
كمت امون اعلى الخصر بجفوفي كون
من اذكرن كلبه عدمن عايفه
بنية الفانوس بالليل من اجيك
الظلمة والكمره اعلى متني من انتجن
اكرم بشيبي اذا ماعندي جيب
البدوي من يكرم تره بطاست لبن
بركت ظهور شكثر جلمة وداع
لجمة لجمة وكل جرح مارايفه
نحشم الحرمل لون بدريبي اجيت
الزهكت بيوسف تراهي طوايفه
