احمد جابر الخفاجي/ بغداد

يكلشي بروحي تندله..

اناغيك بخلك ياراي يمسومر حجي الكذلة ..

يبرحي وما خلص وكتك

خدران الهوه بطاريك كدما ساكر بشفتك

ولو بزلوفك من تعيل …ينجاس الكصب ويميل .. واكلك شوف .. هذا انته ؟!

وتردني بسكتة ( شلونك )..!!

شحلات المستحه الينباگ من تصوغها عيونك

شحلات الگنطرة وهلال .. يهنيالك على  امتونك

الك دكت خصرها الگاع وانته وﻻ الك عرفة ..

وتسابگ جدمي وي الميل .. شمدريني الضوه مكلفة .. وعثرت بطولك ( اسم الله )

ولگيت الطين حنت گاع ومرادي بـ ( هله ) يسولف .. النده بخد الورد ما ينحسب شامة !!

يروحي وتسگي من روحي …

مالك شغل بالنجمات بيدك فرزن جروحي

تلگاني شكثر مشتاگ ..

تلگاني اعلى طول الباب راسم طيفي وامتاني

تلگاني بنفس محتام مايرظى بنفس ثاني

ولو من ريتك حروفي .. !!

ولك مشتاگ .. اي مشتاگ .. يمته تسيل بجروفي

ما تدري الظفيرة تفوح من يعزف عليها الجف 

ما تدري النهر بيه خير بس بحلوگهم ينشف 

فرفح باسمي واتغفه ..

اريد ارجع طفل وانباس اخذلي بكل درب شفة .. 

اجيتك من عمر متعوب والله سنيني مو ترفة

وما اوصيك .. عيش بروحي جلمة خل ..

وﻻ خيط الشمس ينلام كسرت حاجبك بيه ظل  

اعلى گد غطاي دفيني ..

شبرت الگاع كلها وجيتك بـ ( مدري )

والحيطان تتنادس جذب وتسولف بعذري

عطشانك بگد نيتي.. 

ﻻگيني بحضن يعكوب شاف بيوسف مراية

ﻻگيني بخلگ ناعور يحظن كل كتر مايه

واشهگني .. تره المخنوگ يعرف بالهوه يذله

واحويني .. تره البي هيل ينلم بالحظن دلة

وحاجيني … 

الگمر من يحجي يدلع