فراس الاعرجي/ بابل
عطش وجه الرسالة وشرب وجهك ماي
المتخوصر قهر يعرف شنو الخنكة
واجيتك دك رجل والسجة ماشت نار
واجيك والكه وجهك والظهر ملكه
واهز شباج كلبك والكه بي قرآن
واسولفلك حوايج بيه مختنكة
المتخورس قهر تعرف شنو ابمكفا
غميجة احجايته وجم يوسف ابحلكة
المر استفحل ونام اعلى طول الريج
المر لوجان زلمه اطك ظهر خلكه
يبو بركة ضوه وجروحي عتمة ليل
امصرفلك جفن للملكه والشبكة
الكلافة البالجرح مو بالوسع مرات
اكو بيهن زغير وكلفته ابغمكة
الخلالة الطلعت من جيبهه العصفور
اكيد ابن النخل سالوفته ابعركة
يصوباط المراد اسلالنه امعوزات
ماتقبلهه نرجع روسنه مدنكة
يبو خامة هوه اشجم طير كاشخ بيك
تمطر بالعطاية وغيمتك زركه
من اسلهم ظحكتي تنكل جدم فانوس
النظر شبخت سدر يم كبرك معلكة
على متن النهر ماشم متن جناز
لان شفت النهر ماصارلك دركة
الزرع خنصر عطش كاسر خشم للماي
شجاك ومن محمد طيحت وركة
