الشاعر / ناظم السماوي
كش ملك.تاج اعلى راسه
يخاف من تاجه يطير
وكش رئيس..المو رئيس..
بغير شعبه يستشير
وكش وزير..الجان يحلم
يوكف اباب الوزير
وكش امير المايساويله
سعر رشمة بعير
وكش زغير الصار
بالقدرة جبير
وكش اذا صار الوطن
لقمة حلال اعلى الغريب
وكاس شربت من عصير
وكش اذا فوق الرصيف
ايموت شاعر لو مثقف
اغتالته طلقة حرامي
ينزع ويلبس حرير
هاي كلهه ماتساوي
لحظة من موقف عراقي
ابين روحه وعيشته
ونفسه يحير
هاي كلهه ماترجع
ثمن دمعة
اتطيح من جفن الفقير
اشكد فرق بين الاصابع
شمع ذابت حالبه
وخبزة للوادم تصير
اشكد فرق لليكتب
بروحه قصيدة
تبات دفتر عشك
وياك بسرير
اشكد فرق لليرسم اقلام الرصاص
فوق رحلات المدارس
جناح فختة املون
وبالحب يطير
اشكد فرق لليسهر بليل ويفكر
يرسم الضحكة وعصافير وبلابل
وشمس بالظلمة يصير
اشكد فرق للكضه ايامه شريف
وكصته بيضة
يفوح من عدها العبير
اشكد شريف الباس
بسنيني العذاب
اعيون شعبه ويظل عاشك للاخير
اشكد نضيف
اليظل بفصول الزمن
ثوبه نظيف
الماركع بس لاسم هذا الوطن
ولله سبحانه القدير
