سجاد جواد / بغداد
اجي لابس نهر و العطش لاعب بيك
و اوصلك ركض و تكلي ما عطشان
الماحن لولف من شاف جف ولفين
مو نيته العشك يم نيته الف شيطان
يجي ليلي و احس بروحي ما مهيوب
زحمة يظل مضيف بلايه اثر فنجان
على واهس سكتي بصفي نام الطير
و اليعاين بوجهي يعدني عالخرسان
بنيتي وياك انه تمدد شجم عصفور
و بنيتك شفت مدري جم واحد جان
و انته شخذو منك شو احس مبيوك
اجيت بطبع شبكه و مدري جم نيشان
عيب اعلى الزرع لـ يحصده مو فلاح
و شني ذنب الورد لو كاده جف بطران
انه الـ بيه سوالف بيها يغفى الليل
شبيه وباقي اسولف وي كطف خلصان
اظل لـ يا وكت ريشة بجنح مكسور
لا شفت السمه و لا منتجي بكيعان
مو عيب اليحب من يغفى ما مشتاك
و لا واصل لـ ريته و لاعب الدخان
اليدايني ضحكة اضحكله ضحكة ماي
اليشوفني ملكه بـ عقله اطب بستان
يبو ضحكة وطن و الزلف جان فياي
وحك رموش عينك باقي جن حيطان
وحك الـ ما غفو من جاسهم شوك
من اشتاك الك يغفى الدرب تعبان
انه الخليت وجهك وين ما صح اشوف
وانته العفت وجهي بنص سلف عميان
عيني الشافتك هلهلت مثل ام ذاك
الجاي من السفر والباب الها مجان
شسولفلك ولك و الليل خضر طيف
شسولفلك ولك طيحت مني انسان
انه بـ فيّ النخل تلكاني شابع نوم
و اسولف بيك ماي لكل وجه ذبلان
واذب كل حيلي وابجي وعود شلكاك
يرتاح النهر من يكشخ بـ غركان
