سعد الجنابي / ديوانية
لو ادري اخوي براي مرته ونسيبه
چا ما رضعت وياه ذيچ الحليبه
######
عن دربك اشمر غاد عمده منلاگيك
يركبني الف شيطان بس اجبل عليك
########
تتلايم الها فطور لو مرهه طاريك
بور ويجيها الماي روحي منلاگيك
#######
لا ترفع ايدك هيچ بس حرك اشافك
بيهه ارد اسكت حلوگ گالتلي عافك
###########
احملني محمل عاد موش اله سبعين
انطر چنت ما احرف بجدامي اثر طين
########
اليتگاوه چان وياي يتمنه اهده
هسه السلام ادوار بعيوني ارده
#########
چنت الحديد اطويه هاعرضه الاحزام
هسه ادبچ اعله البيض ما ينكسر گام
######
طيح النده يسمعون ربعي بطبعهم
هسه من احشم ليش يثگل سمعهم
###########
من كثر مــا زتيت للمگبرة احــــباب
بچفوفي طگ عاگول من هيل الاتراب
##########
گلوله لـــو جناز يمي ويجيني
ابتشر وافرح بيه ويگرهه عيني
#########
من رحت والشمات عرفو مصابي
امدافع الحجاج صـــار اعله بابي
###########
روحي الوجع والخوف عگبك ولاهه
حــال البچر بالليل واطلوگ اجاهه
########
والله من احـن واشتاگ واذكر الخل
گطعيه يمي اصير حتى اشفگ البل
########
حط نچله بيه وروح لو رايد تروح
مالك وجه مكروه وتكرهك الروح
######
كون الوجع يندار من امي واولاه
موش ابن ابوي بيوم لا گالت احاه
