كاظم اسماعيل الكاطع
ماخذ وياي العراق بجنطة
ما كفت الجنطة
طالعة منها منارة وعثك ونخلة
وشعلة من عيون نفطه
وراح نوصل.. ذاك حد السيطرات
وذيج ضوايات المحطة وين اضمها .
لا هوه اكتاب ويخليه المسافر جوه أبطه
الحمدالله ..الدنيا ليل..ونقطة التفتيش سنطة
هاي نقطة ويمها واحد نقطتين..ثلاثة .خمسة
ست نقاط ويمها واحد .تنحسب مليون نقطة
وصاح مسؤول النقاط بصوت عالي
هاي ما معقولة جنطة
بصيحته انزرعت الساحة
رجال أمن ورجال سلطة
بجرة السحاب شافت عينه نجمة
وطكته ريحة الحنطة
ما لكه غير العلم…كلي شيفيد كتله غربة
احنه غربة
ومن نموت هناك ..جا بيش انتغطه.
اخذ للجنطة تحيه..وكلي توصل بالسلامة
وهاي اول مرة أفوت بسيطرة..
وما انطي رشوة وتستعد كدامي شرطة
