علي حسن الشمري
شوگي شوگ اجروحنه الماغفت طيف
ابظل سچاچين اللچم
شوگي شوگ املوحة الگاع التنخي
ومالگت ريحة زلم
شوگي الك دمعة محطة التغفه وي رفة ضوه
واشتعل صفنة جفن ماشرب نوم
بكل قلم ماسفك دم المحبرة
جرح ماذم التراب
ومارضه اتذله الشمس واتخيط ابشمعة هوه
وآنه كلما اشوف جرحي اشتاگ اشوفك
وينولد وجهك بالمرايه القديمة
ادموع ناس… وتعب خبزة
وثار من إيشان فجرك
والملفات الحمر…. والدم الأسود
والسنين الحبلن بماي الجرح
وصفنة ام وكت الغروب
بمستحاها اتخيط الثوب وتلم شيب العمر
لا وحگ غربة اعيونك
والحنين الشرب عمرك
ترد خيال اعلى جرحك
مايموت الخضر بدمه نخل
ترد واليسأل نگله
الماي يندل كل درب مهجور بي شتلة صبر
رد نطش حيل الضوه بكل عين عاگر
رد نحني اسيوفنه من دم رگبهم
والرگاب الخاوية ماتنضرب
ولاتظن احنه انفطمنه
من يبس ثدي الحرب
من تهب الريح بينه انسوي دمهم گنطرة
ونوصل لحدهم گبل مايبرد الغيظ اعلى چفنه
ومانريد اسيوف تفزع بيها بصمة امزورة
روحي يمته اتفك سجنها بشوفتك
يالون شوگي وياحلم بسمة نهر
مابعت ريتك لمن جاسك عطش
وشفتك الماجدت بيوم الضحك
وعينك الماركضت ابدرب الشمع
اجروحي تغفه بمستحاها
ومن اذكرك…. تعرگ اظنوني سوالف
وانت يانافورة الليل التگطر شذر وردي
انطيني بس شباچ روحك خل الزمه وما اريد
وشرد اگلك…
الخوف ياكل صوتنه وينمد خيال
وانت تدري ..
ابد مايركد الماي ابــ بطن خايف
بين گمرة خيلنه وطگ التفگ
الشرب دخانه الشباب
واگفين.. وماوگف ويانه احد
بات دمنه اعلى السچاچين وبردها
الخضرن دخان بينه
ومن شربنه النار خفنه من الشته ايعود
ويوزعنه بطاقات الرجيف
حتى سرجون الزعيم
غير ارموز الحضارة وبدل الثورة بلجوء ايريح باله
وقلم گلگامش تراجع عن كتابة ملحمة بحق الخبز
وعلي لساه ياخذ من الجوع حصته
ويثلم بـچفه الشريف
من تعب عمره ويوزع بالمحطات الرغيف
والحسين الهسه ينزف كبرياء
والنهر مذلول مايه وباقي بي مأتم عطش
والبطل عباس لساه جربته متروسة غيره
ابراسه يفتر وگفه دخان الخيم
وبعد عندي..
المحطات العفتهن سود ظلن
خيم اعليهن ضباب وروس مرصوفة حوافر
مالگت بالغبشة باب
ولالگت تچوه نفس من طاحت بحلگ النزيف
وروس وگفت لمن طاح الجوع يمها
من لگت خبزتها ذمة اتريد وگفه اعلى الرصيف
آلة التصوير رمده
وخشبة المسرح مريضة
وماوصل صوت الدمع
الأدوار اتقسمت
ومابقه الدور اليجسد حالة اهدوم الفقير
وماكو مثل الجرح صوت
ولاكو مثل الغربة موت
وانت والصفنة نزيف بلايه دم
على اترابك .. على الناس وثگل همها
والسواجي الفارگتها اهموم صبخة
تشهگ ابشوفة الماي
ومن ترد فحطانة تشرب حر عطشها
ونرد آنه وياك والدم
سالفة ميتين بجروح النهار
ون يبو اضلوع الگصب واهسنه هور
وحيل بردي
وخل نغني اثنينه ( احچاية جرح )
وآنه ادري..
يطرب المجروح من ايلچمه عود
وياكل بچبد الهوه لو يرف مغتاظ الجرح
وانت ياطير الضوه
اشما ثگل غيم اوجوهم چفك شمس
شوگي الك شوگ الحنين العايش ابصدرك رمح
