علي سعدون الغزي / ناصرية
ياوريدة وي الورد متواردين
لاكتبناله نده يرويه شعر!
ولافِزَع بينه الدمع نيه حبر!
احنه نصرخْ ياحسين وننتظر صبحه بصلافة
وصاااح( وين اهل الضوه ) ..طااح الگمر وبكل ترافة
وماگعدنه ..
ألا منْ ناصرٍ چن ماسمعنه
ألا منْ نجمهٍ والطف ندهنه
وگعد بينه اللطم ناطور
ولبسنه الليل والاخلاق هوه حسين بس عاشور ؟؟
العظمله شعائر عطش هذا اشكال هم عنده
كبل لتثوبلهم ماي ماتعطش ولاوردة
مو عطشان… وليمته نثوب ماي
وعطشانين شربة راي !!!!
ومو عطشان… شني نفع اليشوف وينخه بالعميان نحرگ خيمة بالتمثيل مانشتم هوه الدخان
مانشتم… ومن نشتم يغزر كل نفس بالطف
نعرف فكرة العباس مو بس چف
مشه لعركة عطش حلال
فصل چفه اعلى شيخ الماي تعلّم منه چم اعگال
اشچم مهرة اشتهت خيال
اشچم فاهي وصُبَح رجال
ومن گالوله زندك گال
النهر مو مال زلمة انخاه
نايمله بحضن جرفين بيدي خزرته انچفه
اللسن من تحلف بعباس تتوضه كون بوفة
وكون العيب ماينعاف
طبع الموت كلش جاف
مايتبلل بموكب اسم طوله مناا…..ولوين
الگاطع شارع بزنجيل مثل ذاك الگطع چفين
البايگ نظرة من نسوان بايگ محبس من حسين
الشمر رقمه اعلى بت الناس يحسب بالجثث مرتين
اي وانت يبت الناس ..
العقيلة وي الشمس عدوان متگبعة بظل عباس
العقيلة بحرب سبي الشمر شدّت ستر رتبة ونوط
كل خصلة شَعَرْ تنشاف تزيد بمتن زينب سوط
ويجينه الاربعين ..
وجدم يسحل جدم متعوب
ويسلم علينه ابليس من گدما بچفنه ذنوب
يهنياله المشى اعلى الغيم
ويچّتِف رموشه جناح منْ يطير
ويهنياله الحفر بالعين ويضمْ شوفه جوه البير
وهنه هواي….
مايخلص حچي الناعور لو لاگيله جواه ماي
خلونه نلم الشوف
ومن كل حلم نعزل خوف
وبوجه اليتيم نطوف نحرم ضحك موش اسهام
خل نحر الرضيع ينام
من يفگ جرحه الثام
نصير لام شهيد احزام
العرّس يمه والدم حار
يرش ملح بجرح جسام
وخلونه نعيش احرار مو تصفيق
ميخالف نحب حسين بس نحتاج للتطبيق
