يحيى المحمداوي/ ميسان
بخيال اخيالي تمشي رغم انته ابعيد
بشرني اجيت الهسه بعدك ظال.
خلك عيني تعب جايبلي خلك وياك
عيوني هواي تعبن واحس حيل اثگال.
فاهم جنت واقره الممحي والمضموم
حبيتك شجاني وبيه صار اخبال.
اعلى درب موادعك حبلن عيوني دموع
عاجر عيني جانت هسه عدهه اعيال.
معروف المثل حبل الچذب ميطول
وعلى طاري اجيتك حبل چذبك طال.
شيخ حچايته المامشت مامهيوب
او وحدة حچايتي انه ولبسوهه اعگال.
كصير وسلتك مالمت العنگود
وجنت اترسهه سلتك لا اترس اسلال.
اعوفك ماگلت الگلك شحاچاك
عافك گلك وصدگت هذا الگال.
عفتني بصفنتي ونص وجهي لم اتراب
الجه وشافاني ماميز بشر تمثال.
خفيف بوزني لكن روحي ثگلت حيل
ما شايل جبل شايلي ست اجبال.
افكلك كلبي وحدك شفت وجهك بيه
وفك كلبك وبيه الك الوجوه اشكال.
يظالملك نفس من الله وجهك وين
ما تفرق جهنم انته والكتال.
رحت وبروحتك برموشي خضر شيب
تهل يمته علي يالوجك عندي اهلال.
اذب حسرة من اذكرك منهه يطلع نار
واحس دخان يصعد ركد يم البال.
نهار رويحتي وشماتي فزعو ليل
وطشرهم نهاري وبقو بس اخيال.
وينك ماتجي خضر گفاي عيون
احاول بس اشوفك تعبيت الحال.
يعجبني الهوه يسير نفس عالناس
علي سير ولو تسيورة مال اطفال.
