سيف بيان / ديوانية

فج البشت وتشوف اشساتر و ضام –

ينهش بجلدي العوز وتشچخ اعضام-

لاجت  عليك الروح  هاشاغت  ابشوگ-

شوغت عشيره انداس بيرغهه بالسوگ-

المافهم ملگاي خله ابمضيفه-

لاعزب ولاضاف وكت الصريفه-

هاهوت صاحو حيل هاتچو الهه-

ماتگع روحي اتغير رزنه ابحملهه-

اغفرلك اشچم دوب ماالگه الك حل-

يالماصنت مگفاي ول عني امش ول-

انهرهه ماترضاش تبذر بذر طيب 

ياروحي لتضيفين مامش معازيب-

بخنگ حصدني وداس وكتي ونشر هام-

خو بيه  ماتلگيش  حبت  شلب  تام —

صح فقره ماعدناش بس نملك احساس –

نتعشه  صم  اتراب  مانچهب  الناس–

باتو  بدون ايدام  هالليلة  العيال –

والجرف مابي جود بس وادم انذال-

تاذيني  لا يالعيد  لاتلفي  هينوب-

بيش اكشخ الملگاك وانه بطرگ ثوب-

امسنح اعلى اتراب وشتم جدمكم – 

وتشبگ اعلى الريح المر سلفكم – 

مو مشتهايه  اعليك تدريني  جوعان –

شيحمله جوع الروح من تشتهي انسان-

طايح شكر بالگاع شفت اسربن سود-

ثاري اعلى أثر رجليك امغرب الدود-

اركت اويه التسلوم شمس الله ونباد-

حيلي  ودفگ  طوفان  هجرك  بالفاد- 

يدردغ اصبي عين گلبي اويه الدموع-

ويخذف  لو ماجيت  ويچسر  الضلوع- 

نغمش دليلي اوفات صوتك عزف ناي –

حاچيني  رد الروح  مو نگطو  ماي–

اتگرب  اتلاشيت  عگبگ  ولا گوم – 

تحيني نشغت شوگ ود عطر الهدوم