كرار حسوني / سماوة
راسم والشكل هيئة شته اجويريد
البارد عشكه يرسم صورته لحاله
والتنطش ضحكتها بين عيد وعيد
تتمرجح شكو ضحكات الاباله
كد ماصافحت ذبت وراك الماي
الكمكم ماخمده وغازل ادلاله
وكشخلك جذب كثر الجذب تنهاب
الحرب ثلث الاعلام يقيم ارجاله
كل ضني منخرجك شرط بيه الكيك
شدراني بوصيته اتوهدنه اعياله
ينكلت راي مالك والبشر من طين
هارون الارض ماعمر ابماله
فرض دية الكمر ذاكه التشلبه الغيم
زغر عمره حتى يسير اهلاله
وانته شسيرت ثوب الحكم زفاك
المتهوم اعلى باطل جابته افعاله
ذمه وي البشر مكبله بس بالليل
المالح شوفه حافظ ركبة الاله
حصتين النخل وصه لسره الكيعان
على رزق الكاع يعلن حصته التاله
اكو حضنت محب تلزم سنة معيدين
وكو ملكه الشماتة مدوهنه احواله
الكوز شماعطش يخلف بعثرة راس
عكس ناموطه بره اوجوه الوشالة
الفظل لله لشهرتك رخه حبل ابليس
اسم النبي شكبره وشهرته ابجاله
ابكوسر حضرتك شيطانك يفز بيك
لهذا ابليس كدره مهندم احباله
لون يدري الجبل بطنه الاصل بركان
جاماخله شكفه اتلاطف ارماله
