كامل الركابي
يا سفر
گلب امي نجمة
ضَّوت الليل الطويل
ياسفر
ندمة ابتعدنه
وظل جرح بينه الرحيل
ياسفر
گمرة وطنّه الغالي تبعد
والبيوت ابغير اهلنه
اشلون تسعد ؟
نهر وشراعك دليل
ونجمة
گلب امي الحزين
ضوَّت الليل الطويل
ياسفر
گلب امي شجرة
يغفه عد فيها الحمام
وبيت من الطيب چفها
وكل اغانيها سلام
بيها من الوحشة
دمعة
والدمع بالسهر
شمعة
تضوي ياعين التنام ؟
وشجرة
گلب امي الحنين
يغفه عد فيها الحمام
ياسفر
گلب امي نهرين
وشموس
چانت ابطيبة نفسها
تحلم الروحي ابعروس
تضوي كل البيت
فرحة
وگلبي المالوم جرحه
ابظِل محبتها يبوس
الورد
بشفاف العروس
ياسفر
گلب امي مثلك هم سفر
بس بالحنين
إنت من تزعل..مسافة
وهيَّ من تزعل ..تلين
ربي..خلها ابعافية
شمس حلوة وصافية
وأشجار تين
واطرد الشر
والمرض عنها
ابورود الياسمين
ياسفر
وجه امي أطيَب
من وجه
أطيب حبيب
اتغيب شمس الله
وگلبها
اشموس
ماتفعل تغيب
أدري بيها امجرّحه
وأدري بيها اهموم
ممتليه عذاب ومستحه
ياسفر
لاچن خذتني
الهجرة لبعيد , السنين
لسه تذكر
بوسه
من تذكرها روحي
ابغربة
يخنگني الحنين
ياسفر
ماتعرف اشموسي
محطات وحدود
باچر
اتصحِّي سمانه
وگمر
عالبصرة نعود
انغني كل احلامنه
البيها طيب ايامنه
وطيب الورود
انبوس طبگتنه ونهرها
وتنكسر كل القيود
ياسفر
گلب امي وهوَّس
گلي هم گالت خذوه
يمّه
خافن ع النهر
ميِّت لگوه
لو انذال الشارع
اتعدَّوا عليه وعذِّبوه
لومثل ماگلي مره
من اعلى طابق
عامل ابظلمه رموه
خايفه
وداعة حنيني
وشيبة الراس
العلى ارباته ضِّوت
ياسفر ل امي سلام
گلها وعيون
اللي عالذِّل ماغفت
إبنچ الآخر محطه
شمس سمره
وماطفت !
