عادل العضاض
غركان البحر ويخم على الكاع
وصعد للسمه مايه ورد إله إردود
بجه وبدموع ما بلل الروجات
لأن وجه البحر خالي من الخدود
وريح امسودنه اتحشمه على الغيض
تريده ايغرك اشما فوكه صايود
وسمع ……….البحر سمع
صوت السراب إيعاند الماي
أنه ابعين الشمس ماعندي احدود
وانت يابحر وبحضنك الكاع
تترجاهه هيه اتشلهك عود
جاوينه غميجك والمحيطات
وجا وين العرض والطول والزود
انهض يابحر بجروفك عيون
تعبها السهر وشداد القيود
انهض هذا وكتك وطرد الخوف
بقت حيتانك تلاوذ بالعجود
لأن دنياك صارت حافة موت
وهوارف بيها تاكل حتى الجلود
انهض على اجتافك صاعد الليل
وعلى احروفك مشه وصار الك كايود
وانت ابكل هظيمه مبردك الخوف
ولا فزعة ضمير اتسرفن زنود
جنت اتأملك يابحر بالكيظ
تشل جف السراب وتسكي العود
ومر بينه الشته والكيظ وسنين
بس اسمك بحر … جا ماكو كل فود
ولا بيك التجيبه النخوة جنحين
وتمر وعود بس دخان بارود
كوم ابحيلك انهض وحنه وياك
نجيب الهوه نسمة الحلك الورود
هيه الغيرة غبشة ابفزة النور
تشد كلوب فوك ارواح وتجود
تشد اكلوب فوك ارواح وتجود
