ساره العبيدي/ بغداد
هيچ بعين گلبك ابد ماانشاف..
يالتارس فراغ العين وانت تراب
مر وانكث سنيني عتاب
بعد دخان صوتك خانگ التفكير
ولهسا يوسفك ماطالع من البير
وانه وداعتك من يوم عني مشيت
ركض بيه العمر خفگة بجنح خفاش
بس براسي بعدك مامشه التقويم
من اذكر ضحكتك احتاج عشر سنين
حتى استوعب الي صار
كبرنه اثنينه بفرگاك
وصلنه لمدري ياعشرين
واحنه اعلى الجرح كلش بعدنه صغار
ماشارب بعدني فكرة التغيير
والدنيا مواسم والفرح خطار
شمدريني الخريف يفرع الاشجار
شمدريني العشگ خطوة بجم سكران
واليهوه رماد بريح
وياريح النحبه شمال
تفرفح روحي بس ارتاح
يسالب راحتي وياراحة البيك
لذة نفس عد غرگان
يمته تمرني مو مليت
احوكن بالظفيرة اعذار
كل باچر خلص ماجيت
وانه متاني كل مغرب يجيبك هيچ عندي ايمان
وماصيحك نجم خليك
بلكي تمرني گمرة شوگ
وانه متانيك مهما تعوگ
مرني شوكت ماعندك مجال تعذب اليهواك
مرني باي وكت بس كون
گبل ما عالچتف انشال
خاف انساك
