الشاعر/ علاء الياسين
اذا مو بيك اسولف انه ماموجود
لان بس بيك اسولف كل وكت انه
تدري انته بمكانك وين بيه يصير
بس شويه وخر تطلع هنانه
مو بس انه احبك انه وانه هواي
وبعد من عندي عشرة نحبك ويانه
ادري انته بشر بس هالخضار منين
ابو البستان شافك حرك بستانه
الورد من شاف طولك بس عليه مريت
ما يقبل بعد يكعد بسندانه
ادري شلون رايك يعني كلنه نموت
كول نموت كلنه منين دفانة
الحانه وداعتك سكرت ناس هواي
بس انته الوحيد السكر الحانة
بتهوفن امس لو سامعك ما صار
يم صوتك امس جاكعدت الحانة
يلوموني من اشوفك اسكت من الخوف
عمي الشاف طولك ضيع لسانه
ربك بالخلق سواك بس سواك
وانه وذوله مدري شلون سوانه
لاتنطينه عين يجوز نطمع بيك
بس انطينه جارك نشتم ردانه
بس اوكف دقايق رحمة للعباس
بس تمر عليك تطيب مرضانه
ماحبن هلك منهم اخاف عليك
نحب يوسف نعم بس نكره اخوانه
انه لدوم احبك ومستحيل انساك
وذا انساك صدك هذا مو انه
عندك علم ؟؟
الشفة زاعلهه الضحك وبغيبتك ماتبتسم !!!
