الشاعر / يحيى العلاق
ابوفاة الملك غازي احتفلو الناس
انتهى عصر الملوك الانتهازي
ربك كال مهلا لاتفرحون
وسبحانه يعجبك من يجازي
ماخلاهه هيج الحمد لله
كام ايروح غازي ويجي غازي
من هاي الوصاية اشوكت ارتاح
وعليمن ارتكز ضاع ارتكازي
بيه اتكابلن سوني نصين
رمح ايران ولسيف الحجازي
انتخبنه وانته من ربعك اختاريت
وانا اختاريت واحد من طرازي
يمثلون الشعب؟والله انته بطران
على نيتك مع كل اعتزازي
متخمرين بالمنطقة الخضراء
الحد ما صار ظلهم تركوازي!!
فصل تشريع.لا.موفصل تشريع
فصل تشريب.. وانواع القوازي
ياهو الكال ماعدهم شهادات؟
شو تعبيرهم كلش مجازي
ماجستير بالقاء الخطابات
دكتوراه بتقديم التعازي
امس صار انفجار وماتو اهواي
لطم وجهه الرصيف وصاح يازي
سدوهه الطرق واستنفر الجيش
وبده ايحلل يوازي ومايوازي
تره الماتو لهلهم مايرجعون
المن بعد اجراء احترازي؟
اسافر وين ..رفضتني المطارت
قسم كالو ارهابي وقسم نازي
على اوراقي لكو اثار بارود
عدل وشتمو الموت ابجوازي
حصتي امن الوطن بس نشرة اخبار
نفطي انباع واستثمرو غازي!!
اجي للبيت الكه الماي مكطوع!
اسالك حمره لو خضره المخازي؟
اخبار النفط ماتروي عطشان
احفرو للشعب بير ارتوازي
احفرو للشعب بير ارتوازي
