الشاعر سعود الخفاجي
ادك بابي اعله روحي وكلي الك ملهوف
وكون انته التدك بالباب كون انته
جاجيتك ركض وبروحي احطك روح
والباب اعله مــــودك كله جاشلته
الهوه عندي من اشمك ياهونته
وتهـون بعين خلك ياهونته
ادك بابـك تكلي باهونته
انا البابك عمه عيونه اعله اديه
يالعشتك حلم عشرين عمر صباي
وبطولك حلـم عشريني راوسته
مفطوم اعله طولك سوله بالمفطوم
عينه لصدر امه وهيـه فاطمته
عطشانك فرح والفرح كلـه اوياك
شيضرك ولو لوكلبي فرحته
صفاني الدمع ومنين اجيب ادموع
وابجيلك حزن واستعطفك حته
عميت وكمت ماوجـد وظليت
طريجي وايست منك وظليت
اعالج بالنفس عكبك وظليت
تجي وبيدك تنكط الماي اليه
علمنـــي الكلب شنهو انته من اشتاك
وانه اعله الصبر والتكضي علمته
وعلمني الجدم لوجل اجيك زحوف
وعنك هالجدم مايوم كصرته
اشبده وشوكك لخلك منجفيته
وعليه شكلت بالله منجفيتـــه
سهم غدرك كتلني منجفيتــه
بدليلي ولاخطه من اكبل عليه
تانيتك عمر وبجفي شلتك عود
ولعودك امس دم كلبـي رخصته
وداريتك غصن وبسدي جنت تلوذ
ظل اوياك اشبن واحترك سكتـة
كل بارح يمرك انه الك نيسان
وانته بنص خريفك كلبي يتمته
حلم جان بخيالي مرعشتـه
ودفه ضلوعي بغيابك مرعشتـه
رعش كلبي وعرفته مرعشتــه
مو رعشة صحوة موت رعشة دليلي
ومن شفتك من بعيد كمت اعله حيلي
وناطرتك فجر واسمك نهاية ليل
ينطر الفجر متكلي جايمته
لاباجر يجي ولاليلي عني يروح
وبعيني الصبـح مطوية سالفته
ميت وشتظن اقتنع من يعيش
وانه الكبليته وبيـدي جفنته
بصليل اشتاي واشتاكك دفنته
دحن دشتاك لكليبي دفنته
وجوب الميت عالمسلم دفنته
ونا الميت عليك شلون بـيـه
