الشاعر / جبار فرحان

بعد ما گلت البگلبي ..

وبلّشت اشرح شعوري ..زاعلتني

وشطبت اسمي بكل سهولة …

وبالعكس ….ردّت قرتني

ردت احّرك بيها ….

انواع المشاعر

عرفت اللعبة الجريئة …

وهي ردّت حّركتني

گبل ما أگللها احبچ

سّدت الباب بوجه كلمات گلبي ..

وهاجمتني

وراحت اتعدّد اخطائي..

وجرأة اقلامي البريئة وشتمتني

گالت …..

احنه اصحاب صح ..

وما بين نار الفرگة …

ونار الزعل خّيرتني

اتخّيلت هيَّ معلمة……

وحافظة انواع الدروس

وانه طالب عدهه …. يمكن درسّتني

خطت بطبشور رغبتها …

شروط ابلا حديث

وعضت اصبعها عليَّ وحذرتني

بالك واياك…..

گالتلي تمر ابمدرستنه

وصفر …..

حطتلي بدرس الاشواگ ورسبتني

بعد ما گلتلها احبچ….

انتفض بيها زعلها

ولبست اخلاق العشيرة وخاصمتني

وصارت اتعدد عليَّ …

وصارت اتملي عليَّ …

اليصير وما يصير .. وبالك واياك

تحچي لو شفتني

وانه بين المستحه … وبين اشرحلها

تيهت كل الكلام …

وعشت وحدي اوي حاسبتي الفقيرة

انشل لساني ….

وشفت روحي عايش بنص ازدحام

چنت امني الروح ….

تعشگ من صحيح …

وعلى افراش الصدگ اتمدد وانام

لكن …..

احسابي طلع غلطان

والشاشة خبيثة …. وضيعّت معنى السلام

والبراءة ….

الچنت احس بيها حمامة …

وعش محنه وليل هادي

طارت ابغير موسمها خطيّه…

وخالفت طبع الحمام

وقررت ….

گلبي اقفله …

واربط اشفافي بحبل كلش متين

حتى لا اسمع ردود ..

امفّصله بخيط الخصام