مرتضى السواعدي/ بغداد
يالجمالج چنه وردة و نازل عليها النده
و ياضحكتج چنهه ضحكة خاسر بوجه العده
الليل وي شعرچ توارد
من فرشناهن سويه
طلع ماخذ منه خصلة
يلي رمشچ سعف نخلة
يلي خدچ چنه گمرة و طالعة بكامل بدرهه
العافية شگد تمشي تلگاچ بدربهه
الكتابة البالرسايل من كحل عينچ حبرهه
الدنيا عندي اني صغيرة
لكن اني من اشوفچ تصبح الدنيا شكبرهه
و هاي صار سنين حاير
هذا وجهج لو شمس
انتي من تحچين صيحاتچ همس
انتي صنع ألفين و تلاثين ما ظن صنع أمس
و ابقى صافن
هذا فص عينچ .. النجمة
انتي من تحچين تفزعلچ حروف
و تبقى تتكاتل و اعاين
بين شفتچ هذا يطلع عسل .. كلمة
انتي يا لمست ادينچ چنهه نسمة
و چم چم ليل اندمج وي ليل حتى بلون شعرچ صار
و چم عطاب من يمر عليچ يرد نسيم عليل
و تصبح ريحته چن ريحة الأشجار
و چم غراب من مر اعله وجهج صار
احلى من النوارس التحط اعله الماي
و ما تكفي ورقتي و انتي بيچ هواي
و انخلقن الچ ضحكات فوگ الوجه متوزعة
من تضحكين أعاين بير مو رصعة
و كل هذا و نگول شواي
المدوخني هاي الشامة فوگ الشفة متربعة
و الگلادة البجيدچ هاي
من نهر العسل تطلع
و يجي المعضد يچلب بيچ حتى يرد حلو و يلمع
