محمد فوزي / البصرة
ماعندي سوالف تحترم بير
حلگ الگاع ويطشرهه الاسرار
ولا اريدك حمامة وعشّك الغي
مابيه النبي اليستوعب الغار
ولا ذاك العذيبي وتستلذ بي
الهوى البيه سموم لحضرتك صار
الشجرة البيهه فيّ اگطعهه وتروح
اذا حسيت بيهه تهاب منشار
اضوگ الشمس عزة نفس وارتاح
الفياي اليجي بمنه يكزبر وحار
الشط الماعبرته مو غمج بي
استحيف افوجه العبرته زغار
امل من سالفة ومابيهه رباط
ومايستهوي بالي الطير لو طار
شايل طبع بدوي مطول البال
لايام المشيب مأجله الثاار
مالح وانعجن بالمالح وياي
دوة وسوالفي منهه الهوى يغار
فطن واشتم بذانك نبرة الصوت
وماتخطيني كلمة من الحجي المار
صگر بس بسماك استحيف الحوم
ومن ذبتك مبين موش صگار
اليجيّم للصگر كل ظنه يشويه
شتسولفله خاطر يغمت النار
لا تارسلي بالي ولا مصفيه
ولنته المستقر ولنته خطار
ماتسوه اعلى ليلي تسير بطيف
وماتسوه الك جتفي يصير معبار
تحملتك ذنب ماعازتي ذنوب
على سجة خاطري شگد شاد اعذار
جنك لا شفتني ولامحاجيك
واذا سألوك گلهم وجهه الندار
