الشاعر عدنان البركي
احبك .. حب مقدس بي رضا الرحمن
مو مثل البعض من يحب عن غاية
ومن كد ما احبك خـفـت حيل اعليـــك
علك شديت الك يم صاحب الراية
داريت الك ، هواي الــك داريــت
بكعبة تضحياتي اطوف الاهواية
صحت مرة العطش وانه اعلى عازة شوف
شلت فص عيني كله اووشلت مايه !
اعلى ثايات الوطن وقعت صك الموت
وانت ويالوطن دكيت الك ثاية
احجاية انطيت الك للموت اظل اهواك
وتعرف بالعراق اشتعني الاحجاية
طبع بيه الوفة امن وحيل ارتاح
بالع من وفى العباس حـبـاية
يالشلتك بديه وكلت خاف اطيح
وضميتك بعقلي .. بمنطقة رايـة
ولهذا من افكر يعني افكر بيك
يا حسبات راسي الرايحة وجايه
يا اعذب جرح غيرت بيه اهواي
تدري انت وتجاهل ما الك ادراية
كابلت المرايه وما شفت انسـان
وبجت من شاهدتني عيون المرايه
تعودت اعلى طولك والرهاوة البيك
اعلى اثر خطوات جدمك روحي مشاية
اذا مر يوم واحد ما اشوفك بي
عليك انصب عزا بميتين ملاية
يا لحظة خجل دنكت من مريت
وعزف كلبي صبا ولسا يون نايه
وعيني الما بجت بس بشهر عاشور
هسه بكـل وكته اعـليك بجايـة
تحملت اعلى مودك حجي ايشيب الراس
وهرج سويت مني بنص الولاية
العشك ما بي حرام البشر لعبوا بي
قران العشك والشرف بي آية
وعشكتك عن شرف لولا الشرف ما جيت
شريف ويمنتي اعلى الشرف حماية
هوايه الرخصتلي بطبتي اعلى السوك
الكل صاحت تفضل واخذ الاكفاية
همس بذني ضميري وصاح لا هيهات
يامن للمكارم تعتني اعناية
